മുഖംമൂടി

എനിക്കന്ന് പതിനഞ്ച് വയസ്സ് .
ഒരു ഇടവപ്പാതിക്ക് ഇടവഴിയിലൂടെ അയല്‍ക്കാരി രമണി ചേച്ചിയോടൊപ്പം കുടചൂടിയൊരു യാത്ര . അവര്‍ എന്‍റെ മുഖം നെഞ്ചോട് ചേര്‍ത്ത് പിടിച്ചിരുന്നു .
അവരുടെ വീട്ടില്‍ എത്തിയപ്പോള്‍രമണി ചേച്ചിയുടെ ചുടുനിശ്വാസം എന്‍റെ മുഖത്ത് .
ആദ്യമായി എനിക്കൊരു മുഖംമൂടി കിട്ടി .

പിന്നെ കോളേജ് കാലം . ഏറ്റവും ശക്തിയുളള വിദ്യാര്‍ത്ഥി പ്രസ്ഥാനത്തിന്‍ റെ യുവ നേതാവ് ഞാനന്ന് .
ആ ശക്തിയില്‍ കോളേജിന്‍റെ മുന്നാമത്തെ നിലയിലെ ഒഴിഞ്ഞ ക്ലാസ്സ് മുറിയില്‍ രണ്ടാം വര്‍ഷ ഡിഗ്രി വിദ്യാര്‍ത്ഥിനി ക്ക് മുന്നില്‍ ഞാന്‍ മറ്റൊരു മുഖംമൂടി ധരിച്ചു .

അവധിക്കാലം ആഘോഷിക്കാന്‍ സുഹൃത്തിനെ തേടി മംഗലാപുരത്ത് എത്തിയപ്പോള്‍ അവന്‍ സല്‍ക്കരിച്ചത് ഒരു മലയാളി അദ്ധ്യാപികയെ സമ്മാനിച്ച് .
അവിടെയും ഞാനൊരു മുഖംമൂടി അണിഞ്ഞു .

മൊബൈല്‍ ഫോണില്‍ യാദൃശ്ചികമായി കിട്ടിയ കിളി നാദത്തെ പിന്‍തുടര്‍ന്ന് എത്തിയത് ഗുരുവായൂരിലെ ഒരു ലോഡ്ജ് മുറിയില്‍ . വീണ്ടും മുഖംമൂടി .

ജോലി സംബന്ധമായി ബാംഗ്ലൂരില്‍ താമസിക്കുമ്പോള് ‍ മുഖംമൂടി അണിയേണ്ടി വന്നത് മൂന്ന് മലയാളി നേഴ്സുമാരുടെ മുന്നില്‍ .

ഫേസ്ബുക്കിലെ ചാറ്റ് ബോക്സില്‍ വന്ന് നിറഞ്ഞ കണ്ണീരിനും , ഭര്‍ത്താവിന്‍റെ നാഡീതളര്‍ച്ചയ്ക്കും പരിഹാരം കണ്ടെത്തിയത് തമ്പാനൂരിലെ ഒരു ഹോട്ടല്‍ മുറിയില്‍ . അവിടെയും ഞാനൊരു മുഖംമൂടി ധരിച്ചു .

കോഫി എ ഡെ കഫറ്റീരിയയില്‍ വെച്ച് പരിചയപ്പെട്ട ഐ റ്റി പ്രൊഫഷണലിന്‍റെ മുന്നില്‍ മുഖംമുടി ധരിച്ചത് എറണാകുളത്തെ അവളുടെ സ്വന്തം ഫ്ലാറ്റില്‍ വെച്ച് .

ചെന്നെയില്‍ ബന്ധുവിനൊപ്പം താമസിക്കവെ മുഖംമൂടി അണിയേണ്ടി വന്നത് പഠന ചിലവിനായി ത്രീസ്റ്റാര്‍ ഹോട്ടലില്‍ എത്തിയ ഹിമാചല്‍ പ്രദേശ്കാരി നാലാം വര്‍ഷ എം ബി ബി എസ്സ് വിദ്യാര്‍ത്ഥിനി ക്ക് മുന്നില്‍.

നാളെ എന്‍റെ വിവാഹമാണ് .

ഒരു താലിച്ചരടിന്‍റെ വിശ്വാസത്തില്‍ എന്‍റെ ജിവിതത്തിന്‍റെ അറയിലേക്ക് കാലെടുത്ത് വെയ്ക്കാന്‍ പോകുന്നആ പെണ്‍കുട്ടി എനിക്ക് മുന്നില്‍ ഏത് മുഖംമൂടിയാവും അണിയുക ...

വസന്തം

കൂട്ടുകാര്‍ക്കൊപ്പം സ്കൂളിലേക്ക് നടക്കവെ ആണ് ഒന്‍പതാം ക്ലാസ്സുകാരിക്ക് കടുത്ത വയറ് വേദന വന്നത് . വേദന കലശലായപ്പോള്‍ അവള്‍ കവലയിലെ വെയിറ്റിംഗ് ഷെഡ്ഡില്‍ ചെന്നിരുന്നു .

അവള്‍ ഒന്നു പുളഞ്ഞു . ഉളളില്‍ നിന്ന് ചൂടേറിയ എന്തോ ഒന്ന് ആന്തലോടെ പുറത്തേക്കൊഴുകി .
വെളുത്ത ഷെമ്മീസ് നിണമണിഞ്ഞു .

ഓട്ടോറിക്ഷ സ്റ്റാന്‍ഡില്‍ നിന്ന് ചില ചെറുപ്പക്കാര്‍ അവളെനോക്കി .
അടുത്ത കടക്കാരന്‍ ഒരു ചായ സമ്മാനിച്ചിട്ട് അവളുടെ കവിളില്‍ നുളളി .

ബസ്സ് കാത്ത് നിന്നിരുന്ന തടിച്ച് തുടുത്ത , മുലക്കച്ചയ്ക്കുളളില്‍ പെഴ്സ് സൂക്ഷിക്കുന്ന , ഒരു സ്ത്രീ അവളുടെ നെഞ്ചില്‍ മൃദുവായി തലോടി ആ നെറുകയില്‍ ഉമ്മ വെച്ചു.
അവള്‍ക്ക് നാണം വന്നു .

ഒരു അപരിചിതന്‍ തന്‍റെ കാറില്‍ അവളെ തിരികെ വീട്ടില്‍ എത്തിച്ചു .
തന്‍റെ വിസിറ്റിംഗ് കാര്‍ഡ് അയാള്‍ അവളുടെ നോട്ട് ബുക്കിനുളളില്‍ വെച്ച് കൊടുത്തു.

അമ്മ അവളെ അടുക്കളയ്പ്പുറത്തെ ചായ്പില്‍ കൊണ്ടിരുത്തി .
വസ്ത്രങ്ങള്‍ മാറ്റിയിടീച്ചു .
പതുക്കെ എല്ലാവരും അതറിഞ്ഞു .
അച്ഛന് മകളെ കാണാന്‍ തിടുക്കം .
അമ്മ വിലക്കി .
എന്നിട്ടും അച്ഛന്‍ അവളെ കണ്ടു ,ചായ്പിന്‍റെ തഴുത് ഇല്ലാത്ത ജനവാതില്‍ അമ്മ കാണാതെ പതിയെ വിടര്‍ത്തി .

അമ്മ അവളെ കുളിപ്പിച്ച് പുതു വസ്ത്രങ്ങള്‍ അണിയിച്ചു .
പച്ച വെളിച്ചെണ്ണയില് ‍ കോഴിമുട്ട പൊട്ടിച്ച് അവളെ കൊണ്ട് കുടിപ്പിച്ചു .

ആരോ അവളോട് ആഗ്രഹം ചോദിച്ചു അവള്‍ ഒരു കണ്ണാടി പറഞ്ഞു .
അവള്‍ അവളെ തന്നെ നോക്കി നാണിക്കാന്‍ പഠിച്ചു കൊണ്ടിരുന്നു .

മൂന്ന് നാല് ദിവസം കഴിഞ്ഞിട്ടും ഇടയ്ക്കിടെ ചോര പൊടിഞ്ഞു കൊണ്ടിരുന്നു .
അവളെ തേടി എണ്ണ പലഹാരങ്ങള്‍ വന്ന് കൊണ്ടിരുന്നു .
ആങ്ങള ഒരു മൊബൈല്‍ ഫോണ്‍ ആരുമറിയാതെ അവള്‍ക്ക് സമ്മാനിച്ചു . അമ്മാവന്‍ അവളെ അമ്യൂസ്മെന്‍റ് പാര്‍ക്കില്‍ കൊണ്ട് പോകാമെന്ന് വാഗ്ദാനം നല്‍കി .

അമ്മ അവളെ കുളിപ്പിക്കുമ്പോള്‍ ഇളയച്ഛന്‍ അവള്‍ക്കുളള പുത്തന്‍ പാവാടയും ബ്ലൌസുമായി അവിടേക്ക് കടന്നു ചെന്നു .

അവളുടെ അദ്ധ്യാപകന്‍ മധുരപലഹാരങ്ങളുമായി വന്നു .
ഇനി മുതല്‍ പതിവായി ക്ലാസ്സില്‍ വരണമെന്നും തനിക്ക് എപ്പോഴും കാണാന്‍ പാകത്തിന് മുന്‍ ബെഞ്ചില്‍ തന്നെ ഇരിക്കണമെന്നും ഉപദേശിച്ച് മടങ്ങി .

അവള്‍ കണ്ണാടിയില്‍ തന്‍റെ മുഖത്ത് ഏഴ് വര്‍ണ്ണങ്ങള്‍ വിരിയുന്നത് കണ്ടു .

അമ്മ എല്ലാം നോക്കി കണ്ടു .

പത്താം നാള്‍ ചോര പൊടിയുന്നത് നിന്നു .

അമ്മ അവളെ കുളിപ്പിച്ചു പുതിയ വസ്ത്രങ്ങള്‍ ധരിപ്പിച്ചു അണിയിച്ചൊരുക്കി .
പൂത്തുലഞ്ഞ പാല മരക്കൊമ്പ് പോലെ സുന്ദരിയായി നില്‍ക്കുന്ന മകളെ ഏറെ നേരം നിറ കണ്ണില്‍ നോക്കി നിന്നു .
ആ കവിളുകളില്‍ മാറി മാറി ഉമ്മ വെച്ചു .
എന്നിട്ട് വിഷം കലര്‍ത്തിയ ചോറ് അവളുടെ വായിലേക്ക് വാത്സല്യത്തോടെ വെച്ച് കൊടുത്തു.

## വല ##

ആരാം മോട്ടലില്‍ നിന്ന് പുറത്തേക്ക് ഇറങ്ങവെ റോഡില്‍ വലിയ ശബ്ദം കേട്ട് അവിടേക്ക് ഓടി ചെന്നു . നടുറോഡിലൂടെ ഞരങ്ങി ഉരുളുന്ന ഒരു മധ്യവയസ്ക്കന്‍ . റോഡിന്‍റെ ഒരു സൈഡിലേക്ക് വെട്ടിച്ച് നിര്‍ത്തിയ വാഹനം വേഗം പിന്നോട്ട് എടുത്ത് റോഡില്‍ കയറി മുന്നോട്ട് കുതിച്ചു . അത് മറ്റ് വാഹനങ്ങള്‍ക്കിടയില്‍ അപ്രത്യക്ഷമായി . ഓടി മധ്യവയസ്ക്കന്‍റെ അടുത്തെത്തി . അയാളില്‍ നിന്ന് ചുടുചോര ടാര്‍ റോഡിലേക്ക് ഒഴുകി കൊണ്ടിരിക്കുന്നു . ഇടതു കാലിന്‍റെ തുടയിലൂടെയാണ് ആ വാഹനം പാഞ്ഞ് കയറിയത് .

 

 അന്ധ്വാളിപ്പ് മാറിയപ്പോള്‍ ചുറ്റും നോക്കി . വൈകുന്നേരം ആയതിനാല്‍ വാഹനങ്ങളുടെ കടുത്ത തിരക്ക് . നടുറോഡില്‍ വീണ് കിടക്കുന്ന മധ്യവയസ്ക്കന്‍റെ ഇരുവശങ്ങളിലൂടെയും വാഹനങ്ങള്‍ തലങ്ങും വിലങ്ങും പോകുന്നു . ആരും നിര്‍ത്താന്‍ കൂട്ടാക്കുന്നില്ല . ചിലര്‍ വാഹനം കുറച്ച് നേരത്തേക്ക് നിര്‍ത്തി ചോരയൊഴുക്കും പിടച്ചിലും ഒന്ന് എത്തി നോക്കിയിട്ട് വേഗം വണ്ടിയോടിച്ച് പോയി . ഒരു കാറില്‍ ആരൊ മൈബൈല്‍ എടുത്ത് ഡയല്‍ ചെയ്യുന്നത് കണ്ടു . കണ്‍ട്രോള്‍ റൂമിലേക്കാവും . അത് വഴി പോയ സൂപ്പര്‍ഫാസ്റ്റിലെ യാത്രക്കാരി ചോരക്കാഴ്ചയില്‍ ബോധം മറിയുന്നതും കാണേണ്ടി വന്നു . 

 

സഹജീവികളോട് കനിവിനായ് കേഴുന്ന ഒരു മനുഷ്യന്‍ . ഇയാള്‍ക്ക് ഒരു കുടുംബം ഉണ്ടാവില്ലെ . കാത്തിരിക്കുന്ന വയറുകള്‍ ഉണ്ടാവില്ലേ . വിവാഹ പ്രായമെത്തിയ ഒരു പെണ്‍മകള്‍ ഉണ്ടായിരിക്കുമൊ ഇദ്ദേഹത്തിന് , രോഗിണിയായ ഭാര്യ അതൊ ഒരു കൂട്ടുകുടുംബത്തിന്‍റെ മുഴുവന്‍ ഭാരവും ഇദ്ദേഹത്തിന്‍റെ ചുമലില്‍ ആയിരിക്കുമോ . ലേറ്റ് മാരീഡ് ആണെങ്കില്‍ പറക്കമുറ്റാത്ത രണ്ട് കുഞ്ഞുങ്ങള്‍ , അവരേം കൊണ്ട് ആ സ്ത്രീ എന്ത് ചെയ്യും . 

 

 

 

ഈ ജീവന്‍ ഇവിടെ പൊലിഞ്ഞാല്‍ വിധിയുടെ പെരുങ്കളിയാട്ടത്തില്‍ എത്ര ജീവിതങ്ങള്‍ ആവും ചോദ്യ ചിഹ്നമാകുക . ദുരന്തങ്ങളുടെ കണക്കെടുപ്പിനുളള നേരമല്ലിത് . ഉണര്‍ന്ന് പ്രവര്‍ത്തിച്ചേ മതിയാകൂ . തുടയെല്ല് പൊട്ടി മജ്ജ പുറത്ത് വന്ന് രക്തത്തിലൂടെ ഹൃദയത്തിലേക്ക് പോകുന്നുണ്ടാവും . ബോണ്‍മാരൊ , ഫാറ്റ് എമ്പോളിസം എന്നൊക്കെ ഡോക്ടര്‍മാര്‍ ഓരോന്ന് പറഞ്ഞ് പേടിപ്പിക്കും . തലയുടെ പിന്‍ഭാഗം ഇടിച്ചാണ് വീണത് . ഏതൊക്കെയോ വെയിനുകള്‍ക്ക് ക്ഷതം ഏറ്റിരിക്കാം . ജീവിതത്തിനും മരണത്തിനും ഇടയിലുളള നൂല്‍പാലത്തിലൂടെ ഒരു ഭൂമിയുടെ അവകാശി . മരണത്തിലേക്ക് മറിയാന്‍ ഏതാനും നിമിഷങ്ങള്‍ മാത്രം .

 

 ഇനി പാഴാക്കാന്‍ സെക്കന്‍റുകള്‍ പോലും ഇല്ല . വേഗം പോക്കറ്റില്‍ നിന്ന് മൊബൈല്‍ ഫോണ്‍ എടുത്തു . ഒരു ആംഗിള്‍ നോക്കി തൃപ്തി വന്നില്ല . വേഗം റോഡിന്‍റെ മറ്റൊരു ഭാഗത്ത് മുട്ടു കുത്തി നിന്ന് മൊബൈല്‍ കാമറ ഫോക്കസ് ചെയ്തു . ഫ്രയിമിലേക്ക് സഹായത്തിനായി നീളുന്ന കൈ , രക്തം പരന്നൊഴുകുന്ന റോഡ് , കാലിലെ കുറച്ച് മാംസം റോഡില്‍ അരഞ്ഞ് ചേര്‍ന്നിരിക്കുന്നു . ബിഗ് ഷോപ്പറില്‍ നിന്ന് തെറിച്ച് വീണ് കിടക്കുന്ന പലവ്യഞ്ജന പേക്കറ്റുകള്‍ . ഒരു വശത്ത് അത് ശ്രദ്ധിക്കാതെ കടന്ന് പോകുന്ന വാഹനങ്ങള്‍ . മറുവശത്ത് റോഡിലേക്ക് ഞാന്ന് കിടക്കുന്ന പൂമരത്തില്‍ നിന്ന് അരിച്ചിറങ്ങുന്ന ശോണ രശ്മികള്‍ . ഫ്രയിം ഫിക്സ് ചെയ്ത് ഒറ്റ ക്ലിക്ക് .

 

 വേഗം എഴുന്നേറ്റ് കാറിനരുകിലേക്ക് ഓടി . ലാപ് ടോപ്പ് എടുത്ത് നെറ്റ് സെറ്റര്‍ കണക്ട് ചെയ്തു , ഡാറ്റാ കേബിള്‍ വഴി മൊബൈലും . ഫേസ് ബുക്ക് ഓപ്പെണ്‍ ചെയ്ത് ഫോട്ടോ ഫയല്‍ ആഡ് ചെയ്തു .

 

 നെറ്റിയില്‍ പൊടിഞ്ഞ വിയര്‍പ്പ് ഒപ്പി ഫോട്ടോയ്ക്ക് തിടുക്കത്തില്‍ ഒരു കാപ്ഷെന്‍ ഇട്ടു . 

 

ദേശീയ പാതകള്‍ നൊ മാന്‍സ് ലാന്‍ലഡുകള്‍ . ഇവിടെ ഫെലൊഫീലിങ്ങുളള മനുഷ്യരില്ല , തലച്ചോറില്ലാത്ത വാഹനങ്ങള്‍ മാത്രം . സഹായത്തിനായി കേഴുന്ന ഈ ചോര പുരണ്ട കൈ നാളെ നിങ്ങളുടേതാവാം

 

 . വേഗം അപ് ലോഡ് ചെയ്തു . ശ്വാസം കഴിക്കാന്‍ മറന്ന നിമിഷങ്ങള്‍ . നെറ്റിലെ വൈദേശിക ദൈന്യതകള്‍ ഷേര്‍ ചെയ്തു മടുത്തു . നല്ല മലയാള ചന്തമുളള 4 ഇന്‍റു 6 ല്‍ 250 dpi വെടിച്ചില്ല് കളര്‍ ഫോട്ടൊ . ഫൊര്‍ ഗ്രൌണ്ടും ബാഗ്രൌണ്ടും റെഡിഷ് , ചോര , സൂര്യന്‍റെ അരുണിമ . കിടു .

 

 ഈശ്വരാ വര്‍ക്കൌട്ട് ആവണെ . പോസ്റ്റിന്‍റെ ദീര്‍ഘായുസിന് ഉളളുരുകി പ്രാര്‍ത്ഥന . പത്ത് ലൈക്ക് , അഞ്ച് കമെന്‍റ് . ഇനി കത്തി കയറിക്കോളും . താങ്ക് ഗൊഡ് .

 

 മോട്ടലില്‍ തിരികെ എത്തി ഒരു ടിന്‍ ബീര്‍ വരുത്തിച്ച് കുടിച്ച് ഇരുപത് രൂപ ടിപ്പ് കൊടുത്തു . 

 

റോഡില്‍ തടിച്ച് കൂടിയ ആളുകള്‍ . സഹായ ഹസ്തവുമായി ഓട്ടോറിക്ഷാ ഡ്രൈവര്‍മാര്‍ , തദ്ദേശ വാസികള്‍ . 

 

തിരക്കിനിടയിലൂടെ കാര്‍ ബദ്ധപ്പെട്ട് മുന്നോട്ടെടുത്തു .

 

 അത് ബീച്ച് റോഡിലേക്ക് കടന്നു .

മകന്‍

വളരെ ദുരിത പൂര്‍ണ്ണമായിരുന്നു എന്‍റെ ബാല്യവും കൌമാരവും . അതിന്‍റെയൊക്കെ പ്രതിഫലം പോലെ നല്ല ദാമ്പത്യം കിട്ടി . ലാളിത്യമാര്‍ന്ന സ്നേഹ സമ്പന്നമായ കുടുംബ ജീവിതം .

ഒരു ഉണ്ണി പിറന്നു .
അമ്മയുടെ രോഗം നേരത്തെ കണ്ടെത്താന്‍ കഴിയാതെ പോയതിനാലായിരുന്നു ഞങ്ങള്‍ക്ക് അമ്മയെ നഷ്ടപ്പെട്ടത് .
അതിനാല്‍ മകനെ ഒരു ഡോക്ടര്‍ ആക്കാന്‍ ഞാന്‍ ആഗ്രഹിച്ചു .
ശ്രീമതിക്കും സമ്മതം .

ഞങ്ങള്‍ അത് പറഞ്ഞപ്പോള്‍ അവന്‍ ചിരിച്ചു . അവന്‍ഡ്രോയിംഗ് ബുക്ക് നിറയെ ഡോക്ടറുടേയും സ്റ്റെതസ്ക്കോപ്പിന്‍റേയും പടങ്ങള്‍ വരച്ച് കൂട്ടി .

ഒടുവില്‍ ആഗ്രഹിച്ച പോലെ അവന്‍ ഒരു ഡോക്ടര്‍ ആയി . ഒരു ഡോക്ടറെ തന്നെ വിവാഹംകഴിച്ചു .
ഞാന്‍ മുത്തശ്ശനായി . ഏറ്റവും സന്തുഷ്ടമായ ജീവിതം തന്നതിന് എന്നും ഞങ്ങള്‍ ദൈവത്തോട് നന്ദി പറഞ്ഞ് പോന്നു .

ഇന്നലെ എനിക്ക് എഴുപത് തികഞ്ഞതിന്‍റെ ആഘോഷം നടന്നു . ഇടക്ക് എന്തോ ഒരു വല്ലായ്മ . മകന്‍ എന്നെ പരിശോധിച്ചു . അവന്‍ കാറില്‍ കയറ്റി എന്നെ ആശുപത്രിയി ലേക്ക് കൊണ്ട്വന്നു.

എനിക്ക് കാര്യമായ എന്തോ ഉണ്ടന്ന് മനസ്സിലായി .
ഓപ്പറേഷന്‍ തീയറ്റര്‍ . അവിടെ മകന്‍ നിസ്സഹായനായി കാണപ്പെട്ടത് എന്നെ വേദനിപ്പിച്ചു . ആര്‍ക്കോ വേണ്ടി ചെയ്യുന്നത് പോലെ, ഞാനവന്‍റെ അച്ഛനായിട്ട്പോലും . ഒരു യന്ത്രം കണക്കെ അവന്‍ കാണപ്പട്ടു . ഞാന്‍ മയക്കത്തിലേക്ക് വഴുതി .

ബോധം വന്നപ്പോള് ‍ ഞാന്‍ നിരീക്ഷണ മുറിയിലാണ് . ഡോക്ടര്‍ മകനെ അടുത്ത് കിട്ടിയപ്പോള്‍ ഞാന്‍ ചോദിച്ചു
"മകനെ നിനക്ക് ആരാവാനായിരുന്നു ആഗ്രഹം".
എന്നെ നോക്കി ആദരപൂര്‍വ്വം അവന്‍ പറഞ്ഞു
" ഒരു ചിത്രകാരന് ‍ " .

പര്‍വ്വതം

പോലീസും സന്നദ്ധപ്രവര്‍ത ്തകരുംപത്രക്കാരും മല ചവുട്ടിക്കയറി ആപൊളിഞ്ഞ കെട്ടിടത്തിന് മുന്നില്‍ എത്തി .
കറുത്ത് തടിച്ച കുളളന്‍റെ ചുവന്ന കണ്ണുകള്‍ക്ക് മുന്‍പില്‍ ഒരു നിമിഷം പകച്ച് നിന്നെങ്കിലും വേഗം അവര്‍ അയാളെകീഴടക്കി .
ഫ്ലാഷുകള്‍ മിന്നി .

നിലം പൊത്താറായ ആ കെട്ടിടത്തിന്‍റ െ ഉള്ളിലേക്ക് അവര്‍ കയറി .
ചിതറി കിടക്കുന്ന ഭക്ഷണപ്പൊതികള്‍ , മദ്യക്കുപ്പികള് ‍ , ബീഡിക്കുറ്റികള് ‍ .
ഒരു മൂലയ്ക്ക് പതുങ്ങി ഇരിക്കുന്ന അവള്‍ .
ഒരു കാലിന് സ്വാധീനമില്ലാത് ത , നടു വളഞ്ഞ , കോന്ത്ര പല്ലുകള്‍ ഉളള വിരൂപിയായ അവളുടെ മുഖത്ത് പരിക്കുകള്‍ ഉണ്ടായിരുന്നു .
അവള്‍ പകുതിയും നഗ്നയായിരുന്നു.

സംഘത്തില്‍ ഉണ്ടായിരുന്ന ഒരു സ്ത്രീ കുപ്പിയിലെ വെളളം കൊണ്ട്അവളുടെ ദേഹം തുടച്ച് ഒരു മാക്സി ധരിപ്പിച്ചു .
മൂവി കാമറകള്‍ ആ ദൃശ്യം പകര്‍ത്തി കൊണ്ടിരുന്നു . എല്ലാരും മല ഇറങ്ങി .
കറുത്ത് തടിച്ച് സംസാര ശേഷി ഇല്ലാത്ത കുളളനെ പോലീസ് കോടതിയില്‍ ഹാജരാക്കി .
 

 

അവള്‍ തിരികെ വീട്ടില്‍ എത്തപ്പെട്ടു പതിനഞ്ച് ദിവസത്തെഅജ്ഞാത വാസത്തിന് ശേഷം.
തട്ടി കൊണ്ട് പോകല്‍ വാര്‍ത്തയായതിനാ ല്‍ കുറച്ച് ദിവസത്തേക്ക് അവള്‍ കൌതുക വസ്തുആയി .
പിന്നെ പതിയെ ആരും തിരിഞ്ഞ് നോക്കാതായി .
എല്ലാം പഴയ പോലെ ആവര്‍ത്തിക്കാന് ‍ തുടങ്ങി . പുലര്‍ച്ചെ ജനലിലൂടെ നോക്കി കറവക്കാരന്‍ വിളിച്ച് പറയും
' കുരടി പാറൂ നേരം വെളുത്തൂ ' . സഹോദരന്‍റെ മകന്‍റെ കൂട്ടുകാര്‍സ്കൂളില്‍ പോകും വഴിമുറ്റത്തെത്തി ജനലിലൂടെ അവളെ നോക്കി വിളിച്ച് പറയും
' ഹായ് ഞൊണ്ടിക്കാലി അപ്പച്ചീ കോന്ത്രപ്പല്ല് തേച്ചാരുന്നോ ' .
അവള്‍ ചിരിക്കും .
അത് കണ്ട് അവര്‍ പേടിച്ച് ഓടിക്കളയും .
വീണ്ടും നിശബ്ദത .
 

 

ഒറ്റപ്പെടലിന്‍റ െ കിരാത നിമിഷങ്ങളില്‍ മനസ്സ് പിറകോട്ട്ഓടി .
ഇതേ പോലെ ഒരു ഒറ്റപ്പെടലിന്‍റ െ നിമിഷത്തിലായിരു ന്നു അയാള്‍ വന്നത് .
ഒരു മുയല്‍ കുഞ്ഞിനെ എന്ന പോലെ തന്നെ എടുത്ത് തോളിലിട്ട് നടന്നു . നിലവിളിച്ചപ്പോള ്‍ വായ് പൊത്തിപ്പിടിച്ച ു . തന്‍റെപല്ലുകള്‍ കോണ്ട് അയാളുടെ കൈ മുറിഞ്ഞ് ചോര ഒഴുകി കൊണ്ടിരുന്നു .
കരിമ്പിന്‍ തോട്ടത്തിനിടയില ൂടെഅയാള്‍ വേഗം നടന്നു . വാശിയോടെ മല ചവുട്ടി കയറി 

 

അയാളുടെ താവളത്തില്‍ എത്തി തന്നെ താഴേക്ക് ഇട്ടു . വെല്ലം കൊണ്ട് പോകുന്ന മെടഞ്ഞ പനയോലയിലേക്ക് വീണപ്പോള്‍ മുതുകില്‍ എന്തോ കുത്തിക്കയറി .
തന്‍റെ വസ്ത്രങ്ങള്‍ അയാള്‍ വലിച്ച് കീറി . ഭ്രാന്തമായി തന്നിലേക്ക് ആഴ്ന്നിറങ്ങി .
തന്‍റെ നിലവിളി ചൂട് കാറ്റില്‍ ആവിയായി പോയി .
പതിയെ അയാള്‍ തന്നെ വിട്ട് തെല്ല് മാറി മലര്‍ന്ന് കിടന്ന് ഉറങ്ങാന്‍ തുടങ്ങി . ചാരായത്തിന്‍റെ മണത്തോടൊപ്പം പേടിപ്പെടുത്തുന ്ന കൂര്‍ക്കം വലി .
നുറുങ്ങുന്ന വേദന , വിശപ്പ് , തളര്‍ച്ച . പതിയെ താനും തളര്‍ന്നുറങ്ങി .
 

 

ബോധം വരുമ്പോള്‍ അയാള്‍ തന്നെ കൈയ്യില്‍ താങ്ങി എടുത്ത് നടക്കുകയാണ് . മരങ്ങള്‍ക്കിടയി ല്‍ തന്നെ കൊണ്ട് ഇരുത്തിയിട്ട്അയാള്‍ മറ്റൊരിടത്ത് പോയിരുന്ന്വിസര്‍ജിക്കാന്‍ തുടങ്ങി . താനും അതേ പോലെ ചെയ്തു.
വീണ്ടും അയാളുടെ കൈകളില്‍ യാത്ര. മലയുടെ ഒരു ഭാഗത്തെ അരുവിയില്‍അയാള്‍ തന്നെ കുളിപ്പിച്ചു .
എന്തോ വളളി പറിച്ച് ദേഹം നന്നായി ഉരസി കഴുകി തന്നു .
തല തുവര്‍ത്തി ശരീരം തുടച്ചു തന്നു .
വീണ്ടും അയാളുടെ കൈകളില്‍ ഒരു മുയല്‍ കുഞ്ഞിനെ പോലെ യാത്ര . ഇടയ്ക്ക് ഏതോ മരത്തിന്‍റെ കായ പറിച്ച് ഉളളം കൈയ്യിലിട്ട് പൊട്ടിച്ച് അതിന്‍റെ നീല ചാറ് തന്‍റെ മുറിവുകളിലേക്ക് ഇറ്റിച്ചു .
പൊളിഞ്ഞ കെട്ടിടത്തില്‍ എത്തി മെടഞ്ഞ പനയോലയില്‍ ഇരുത്തി . ഭക്ഷണ പൊതി നിവര്‍ത്തി തണുത്ത അപ്പവും ചെറുപയറ് കറിയും കുഴച്ച് വായിലേക്ക് വെച്ച് തന്നു .
കുപ്പിയിലെ വെളളം പലയാവര്‍ത്തി തന്നെ കൊണ്ട് കുടിപ്പിച്ചു .
വഴിയില്‍ നിന്നോ മറ്റോ എടുത്ത കുറെ തുണികള്‍ എടുത്ത് മടിയില്‍ഇട്ട് തന്നിട്ട് അയാള്‍ഇറങ്ങിപ്പോയി .
 

 

വിശപ്പ് അടങ്ങിയപ്പോള്‍ പാളികളും അഴികളും ഇല്ലാത്ത ജനവാതിലിലൂടെ വെറുതെ പുറത്തേക്ക് നോക്കി .
പച്ച പുതച്ച് കിടക്കുന്ന മലനിരകള്‍ . അവയ്ക്കിടയിലൂടെ കൂട്ടം ചേര്‍ന്ന് പറക്കുന്ന പക്ഷികള്‍ .
രാത്രി മൂക്കറ്റം കുടിച്ച് ചുണ്ടില്‍ എരിയുന്ന ബീഡിയുമായ് അയാള്‍ കയറി വരും .
തന്നെ വിവസ്ത്രയാക്കും . തന്നിലേക്ക് ആഴ്ന്നിറങ്ങും . കൂര്‍ക്കം വലിച്ച് ഉറങ്ങും .
മഴയുള്ളൊരു രാത്രിയില്‍ അയാള്‍  തന്‍റെ ഉടുമുണ്ട് തന്നെ പുതപ്പിച്ചിട്ട് നഗ്നനായി കിടന്നുറങ്ങി .
അയാള്‍ക്ക് സംസാര ശേഷി ഇല്ലാത്തതിനാലാവ ും താനും ഒരിക്കലും സംസാരിച്ചില്ല .
ഒരു ദിവസം അയാള്‍ കയറി വന്നപ്പോള്‍ തന്‍റെ രണ്ട് കാല്‍മുട്ടുകളും പൊട്ടി ചോര ഒലിക്കുന്നു . ചിതറി കിടക്കുന്ന ഭക്ഷണ പൊതികളും കുപ്പികളും ബീഡികുറ്റികളും പെറുക്കി കളയാന്‍ ശ്രമിച്ചപ്പോള്‍ പറ്റിയതാണ് .
അയാള്‍ കൈ നിവര്‍ത്ത് തന്‍റെ കരണത്ത് ഒന്ന് പൊട്ടിച്ചു .
പുറത്ത് പോയി കായ പറിച്ച് ഉളളം കൈയ്യിലിട്ട് പൊട്ടിച്ച് അതിന്‍റെ നീല ചാറ് തന്‍റെ മുറിവുകളിലേക്ക് ഇറ്റിച്ചു .
 

 

തന്‍റെ കണ്ണുകള്‍ നിറഞ്ഞിരിക്കുന് നത് യാദൃശ്ചികമായാണ് അയാള്‍ കണ്ടത്.
ഭക്ഷണ പൊതി എടുത്ത് വലിച്ചെറിഞ്ഞ് തന്നെ വലിച്ച് നെഞ്ചിലേക്കിട്ട ് ഗാഢമായി പിടിച്ചു . തലയ്ക്ക് കാര്യമായ തകരാര്‍ ഉളളത് കൊണ്ട് താന്‍ വായ തുറന്നാല്‍ കടുത്ത ദുര്‍ഗന്ധം വമിക്കും എപ്പോഴും . അയാള്‍ പരുക്കന്‍ കൈകൊണ്ട് മുതുകില്‍ തലോടി . ചുണ്ടിലും ചെവിയിലും ആവേശത്തോടെ കടിച്ചു . ചുണ്ടില്‍ തെരുതെരെ ചുംബിച്ചു .

സ്റ്റീല്‍ പാത്രത്തിന്‍റെ ഉരസല്‍ ശബ്ദം കേട്ട് അവള്‍ ഓര്‍മ്മകളില്‍ നിന്ന് പിടഞ്ഞെണീറ്റു . സഹോദരന്‍റെ ഭാര്യ പാത്രത്തില്‍ ചോറും ഒഴിച്ച് കറിയുമായി ജനവാതിലിലൂടെതന്‍റെ നേര്‍ക്ക് തളളി വിട്ടതാണ് .
അവള്‍ മുട്ടില്‍ ഇഴഞ്ഞ് ചെന്ന് സ്റ്റീല്‍ പാത്രം എടുക്കവെ അപ്പുറത്ത് ഏട്ടത്തിയമ്മ ആരോടൊ പറയുന്നത് കേട്ടു .
' ആ കുളളന്‍ പിശാചിനെ കോടതി ആറ് വര്‍ഷം തടവിന് വിധിച്ചു ' .

മലകയറ്റം

അയാള്‍ മല കയറാന്‍ തീരുമാനിച്ചു.

ഒപ്പം ഒരു പെണ്‍കൂട്ട് ഉണ്ടെങ്കില്‍ നന്നായിരിക്കുമെന്ന് ഉപദേശിച്ചത് മനു ആണ് .

മനു വളരെ കണ്‍വെന്‍ഷണല്‍ ആണെന്നാണ് പറയപ്പെടുന്നത് . സ്ത്രീയുടെ എല്ലാ അവസ്ഥകളിലും പുരുഷന്‍ അവളെ സംരക്ഷിച്ചിരിക് കണമെന്ന് അവന്‍ നിഷ്ക്കര്‍ഷിച്ച പ്പോള്‍ പുരുഷാധിപത്യം എന്ന് അവന്‍റെ സുഹൃത്തുക്കള്‍ തന്നെ തളളി പറഞ്ഞു .

മല കയറാന്‍ പ്രത്യേക തയ്യാറെടുപ്പ് ഒന്നും വേണ്ട.
അല്ലെങ്കില്‍ തന്നെ മുന്‍കരുതല്‍ എടുപ്പിക്കാനും സദുപദേശം തരാനും കയറിപ്പോയ ആരും തന്നെ തിരികെ വന്നിട്ടില്ല താനും .

മെലിഞ്ഞ് പൊക്കം കൂടിയ ഒരുവളെ ഒപ്പം കൂട്ടി . 
അവളുടെ നാവ് കുറുകിയത് ആയിരുന്നു .
അവള്‍ താളത്തില്‍ കിതച്ച് കൊണ്ട് അയാള്‍ക്കൊപ്പം മല ചവുട്ടി .
കിതപ്പിന്‍റെ ഇടവേളകളില്‍ അവള്‍ ഒന്നോ രണ്ടോ വാക്കുകള്‍ മാത്രം പറഞ്ഞു .

വഴിയില്‍ വിശപ്പകറ്റാന്‍ ജ്ഞാനപ്പാനയും നിത്യാരാധന പുസ്തകവും അയാള്‍ കരുതിയിരുന്നു.

ചവുട്ടി കയറിയ വഴികളിലെങ്ങും വിലക്കപ്പെട്ട കനികള്‍ ഏതും കണ്ടില്ല . അതിനാല്‍ അവര്‍ നിത്യാരാധന പുസ്തകം നോക്കി ചില വിലക്കുകള്‍ സ്വയം ഏര്‍പ്പെടുത്തി .

കാലുകള്‍ തളരുമെന്ന് പ്രതീക്ഷിച്ചെങ്കിലും കുട്ടിക്കാലത്ത് അര്‍ത്ഥമറിയാതെ ഉരുവിട്ട സന്ധ്യാ നാമത്തിന്‍റെ കരുത്തില്‍ തളര്‍ച്ച അറിഞ്ഞില്ല .

വഴിയാത്രയില്‍ അവളെ ചിരിപ്പിക്കാന്‍ ശ്രമിച്ചു . അവള്‍ ചിരിച്ചില്ല , ഗൌരവം നടിക്കുകയും ചെയ്തു .

മനു പറഞ്ഞതില്‍ എന്തോ കാര്യമുണ്ട് .

ജ്ഞാനപ്പാന അഴിച്ച് രണ്ടായി പകുത്ത് ഒരു പകര്‍ച്ച അവള്‍ക്ക്നല്‍കി . അവളത് ആര്‍ത്തിയോടെ ഭക്ഷിച്ചു .

മനുവിന് വെറുതെ തോന്നിയതാവും .

വിശപ്പകന്നപ്പോള്‍ അവള്‍ നെടുനിശ്വാസം വിട്ടു . ഇനി അവള്‍വേഗം നടക്കും എന്നയാള്‍ കരുതിയപ്പോള്‍ അവള്‍ കൂടുതല്‍ അലസയായി .

മനു തീരെ വിഡ്ഡിയല്ല .

മല മുകളില്‍ നിന്ന് തടിച്ച് കൊഴുത്ത കാട്ട് പശുക്കള്‍ അമറലോടെ അവര്‍ക്ക് നേരെ പാഞ്ഞടുത്തു വന്നു . അയാള്‍ അവളെചേര്‍ത്ത് പിടിച്ച് വേഗം ഒരു വശത്തേക്ക് മാറി നിന്നു .
ലക്ഷ്യം തെറ്റിയ കാട്ട് പശുക്കള്‍ നില തെറ്റി താഴേക്ക് മലക്കം മറിഞ്ഞു .

അവളില്‍ ലജ്ജ കാണായി .
ഒരു സ്ത്രീക്ക് ഏറ്റവും അവശ്യവും അത്യാവശ്യവും ഉണ്ടായിരിക്കേണ്ട ഗുണമാണ് ലജ്ജ.
അത് നഷ്ടപ്പെടുന്നിടത്ത്ന്ന് അവളിലെ സ്ത്രീ ചൈതന്യം ചോര്‍ന്ന് തുടങ്ങും .

മല കയറ്റത്തിനിടെ പിന്നെയും തുടരെ ആപത്തുകള്‍ അവര്‍ക്ക് നേരെ വന്ന് കൊണ്ടിരുന്നു . ഒന്നൊന്നായി അവയെല്ലാം അയാള്‍ തരണം ചെയ്ത് കൊണ്ടിരുന്നു .
അവളെ ത്രാണം ചെയ്ത് പോന്നു .

അപ്പോഴൊക്കെയും അവള്‍ ലജ്ജിച്ചു.

ജ്ഞാനപ്പാനയും നിത്യാരാധന പുസ്തകവും തീരാറായി .

മുകളില്‍ നോക്കെത്താ ദൂരത്തോളം മല പിന്നെയും വളര്‍ന്ന് നില്ക്കുന്നു .
താഴെ തങ്ങള്‍ കയറി തുടങ്ങിയിടം ഇരുട്ടില്‍ മാഞ്ഞ് പോയിരിക്കുന്നു .

തങ്ങളുടെ പാദ പതനമേറ്റ പാറക്കെട്ടുകള്‍ ശാപ മോക്ഷം കിട്ടി തുടര്‍ന്ന് വരുന്നവര്‍ക്കായി പ്രതലം വഴുക്കനാക്കി കാത്ത് കിടന്നു .

തണുത്ത മലങ്കാറ്റ് തഴുകി പോയപ്പോള്‍ അവളില്‍ നിരാശാ ശൈത്യം പടര്‍ന്നു . 
കരിങ്കല്‍ പൊടി അടിച്ച് അവളുടെ മുഖം കറുത്തു .

മനു ബുദ്ധിമാനാണ് . മലകയറ്റത്തിന്‍റെ ദൈര്‍ഘ്യം അവന്‍ എവിടെയും പറഞ്ഞ് വെച്ചിട്ടില്ല .

അവര്‍ നടത്തം തുടരവെ പെട്ടന്ന് മലയുളള ഒരു വിളളലില്‍ അയാളുടെ കാല് കുടുങ്ങി .
അയാള്‍ ഞരങ്ങി .
സഹായത്തിനായി കൈ നീട്ടി നോക്കുമ്പോള്‍ അവിടെയെങ്ങും അവളെ കണ്ടില്ല .

മനു ചതിച്ചു .

അയാള്‍ പറഞ്ഞൊപ്പിച്ചു .